2.1.09

Gleðilegt nýtt ár!

Nú þegar árið 2008 er búið er mér svolítið létt, einhverra hluta vegna. Árið var gott, svona að meðaltali. Ýmislegt var frábært og annað var leiðinlegt og/eða sorglegt. Upp úr standa í frábærleika sínum, ferðalögin sem við fórum á árinu, sem og margar góðar stundir sem við eyddum með vinum og fjölskyldunum okkar.

Ég var ekkert geysilega dugleg í útsaumnum árið 2008, en kláraði þó ýmislegt. Ég sparkaði hins vegar í rassinn á mér varðandi skólann og kláraði 27 einingar á þremur önnum og á þess vegna bara 8 einingar eftir í útskrift, sem mun verða í lok maí þessa árs!!! Ég hlakka til að takast á við þetta litla sem er eftir :-)

Á maður að vera að setja sér mörg markmið fyrir árið 2009? Það er svo mikil óvissa í þjóðfélaginu ennþá að ég veit ekki einu sinni hvort fyrirtækið sem ég vinn hjá verði lifandi þegar líður aðeins á árið. Ég held samt að það sé nokkuð ljóst að ég muni útskrifast í lok maí og verð þá loksins orðinn stúdent frá Verzlunarskóla Íslands... örfáum árum á eftir jafnöldrum mínum ;-)

Ég tók fram prjónana rétt fyrir áramót og er næstum því búin að klára trefilinn sem ég byrjaði á haustið 2007 og lagði svo til hliðar eftir ca. 40 sentimetra. Mig langar að gera meira af því að prjóna á næstunni; nota eitthvað af þessu garni sem fyllir tvær skúffur í kommóðunni hjá mér. Mig langar líka að fara að sauma... ekki sauma út, heldur sauma föt og töskur. Það er bara verst að efniviður í slíkt er ansi dýr hér á klakanum. Ég reyni að vera dugleg að notfæra mér útsölur í þessum málum!

Heilsumarkmið ársins 2009 eru frekar einföld; vera dugleg í göngutúrunum með Sólrúnu og fara í reglulegri líkamsrækt þegar skólinn er búinn. Tvö síðastliðin ár hef ég ætlað mér að ganga á topp Esjunnar, en það hefur ekki tekist ennþá. Hér með skora ég á fjölskyldu og vini að taka mig með, þegar þau fara slíka ferð, því það er greinilegt að mér tekst ekki að koma mér af stað sjálfri! Allt sem ég bið um er ca. 2ja daga fyrirvari því maður þarf nú að skipuleggja sig svolítið í þessu lífi líka.

Að lokum vil ég deila þessari snilld með ykkur: Yankee Rose með David Lee Roth! "Our lips are so close" "Ewwww... not if you were the last immigrant that grows on earth... HONEY!" Hahahahaha hvað maður hló yfir þessu hér í gamla daga.

1 Ummæli:

Þann 05 janúar, 2009 14:23 , Blogger jeg sagði...

Gleðilegt árið skvís. Já margt breytist nú í kjölfar kerppunnar en þó ætti maður að lifa það af. Ég er aftur á móti alveg dottin úr gír með prjónið og ætlaði sko að klára peysu fyrir jól en þar sem ég þurfti að hætta þegar kallinn slasaði sig fann ég mig ekki aftur svo þetta verður SÍÐbúin jólagjöf vonandi um páska heheheh...
Gaman væri að hittast á nýju ári en þar sem fólk er alltaf að vinna þegar ég er á ferðinni er það dáldið snúið fyrir mig að kíkja á fólk en ég er aftur á móti nánast alltaf heima ef þú ert á norðuleið í reisu um landið.
Kveðja úr sveitinni.

 

Skrifa ummæli

Gerast áskrifandi að Birta ummæli [Atom]

<< Heim