Ég fór á árslokahóf vinnunnar í gær. Við byrjuðum á Fjörukránni, fengum léttar veitingar og smá víkingaskemmtun. Mjög góður félagsskapur sem ég er komin í þarna og mér tókst að kynnast nokkrum samstarfsmönnum í viðbót. Það er nokkuð stór hluti af starfsmönnunum sem eru úti í bæ að vinna, eða stundum úti í Englandi t.d., þannig að mér finnst erfitt að setja saman nafn og andlit þegar ég hef kannski bara hitt manneskjuna einu sinni eða tvisvar. En þetta er allt að koma, vonandi, og ég held ég hafi gert nokkrar samsetningar í viðbót í höfðinu á mér í gær. Rétt upp úr miðnætti héldum við nokkur á Vegamót og eftir það var haldið í "partý" hjá Þorgerði, eðal-vinkonu minni. Þar var rosalega gaman, einn af strákunum fór með gamanvísur í tonnatali og það var mikið hlegið og kjaftað. Ég fékk að tala fullt af ensku við hann James Brown (hann heitir það, ég er ekki að djóka) sem var alveg indælt því mér þykir jú svo gaman að tala ensku. Rosalega hress strákur og við erum með álíka klikkaðan húmor. Að lokum var farið í ofsalega langan bíltúr í leigubíl og ég var ekki komin heim fyrr en upp úr kl. 5 í morgun! Eiginmaðurinn sagði líka "Góðan daginn" þegar ég kom inn :-) Ekki oft sem ég næ að vera svona lengi á "djamminu", er yfirleitt allt of löt til að endast eitthvað.

Næst-síðasti dagur ársins í dag og ég ætla að kíkja í búðir á eftir. Hef fullt af bókum til að skipta fyrir fjölskylduna, nokkuð var um að við fengjum sömu bækurnar tvisvar.