Jólin voru róleg og yndisleg, aðfangadagskvöld sérstaklega, þar sem við vorum bara 4 heima, nutum matarins í tætlur og dunduðum okkur við gjafirnar fram eftir kvöldi. Þetta voru sannkölluð bókajól, þar sem allt flóði bara í bókum hjá okkur. Allir hafa nóg að lesa á næstunni og þá hugsa ég að litla fjölskyldan sé bara nokkuð hamingjusöm! Elsku maðurinn minn gat náttúrulega ekki hugsað sér að gefa mér "bara" tölvuskjáinn sem kom inn á heimilið í vikunni fyrir jól, heldur gaf hann mér líka rosalega flotta eyrnalokka. Þessi elska :-) Bautabúrs-hamborgarhryggurinn var alveg með eindæmum góður, hangikjetið hennar tengdamömmu á jóladag var líka mjög gott en svo var líka frábært að fá ferskan lambahrygg, eldaðan á gamla mátann í gærkvöld. Við vorum s.s. aftur heima í gærkvöld þar sem eldri dóttirin tók upp á því að fá 39°C hita í gærmorgun. Henni líður aðeins betur strax í dag og ég vona bara að það haldist.

Ég eignaðist "lítinn" frænda í gærkvöld sem mætti loksins á svæðið um kl. 21, 13 dögum eftir áætlaðan fæðingardag, 4300 gr að þyngd og 55 cm langur! Enginn smá karlmaður þar! Ég hlakka til að fá að sjá hann einhvern tíman á næstunni. Innilega til hamingju, elsku Aðalheiður og Starki, með soninn!

Ég púslaði eina jólagjöfina í gærkvöld, Björg vinkona gaf mér mynd úr heimsreisunni sinni í púslformi og ég skemmti mér konunglega við að raða henni saman. Stráþakið sem þekur ca. 1/4 myndarinnar var sérlega gaman að eiga við!

Vonandi hafið þið öll haft það rosalega gott yfir jólin. Ég hefði alveg getað hugsað mér að vera heima einn dag í viðbót, sérstaklega þar sem veðrið var ansi vott og hvasst þegar ég vaknaði í morgun kl. 6:45. Maður lætur sig hafa þetta... fæ frí á föstudaginn, enda verður vinnudjamm á fimmtudagskvöldið!